بتحكي الحاجه فاطمه من سكان إحدى قرى جنوب الجزيرة. كنا عايشين في امان الله نبدأ يومنا بي كبايه الشاي والزلابيه وفي نار الشاي نخت كان ملاح نعيميه وكان ويكه خضراء وعارفين غير العصيدة مافي شي يقدرنا. الله راد وجونا اهل الراجل اولاد عمو عمرهم كلو قضو في الخرطوم جابتهم الحرب اها اول أيامهم كانو ضيوف البنعملو بياكلو وقت تمو الاسبوع بدينا نرجع للويكه والخضرة والقرع والكلام ده البنيات م عجبن واكلن كلو بقى من الدكان ابونا قال لي دحين يا ختي استرينا مع البنيات ديل وخلي ليهن المطبخ يسون اكلن البياكلنو ونحن بناكل معاهن قولت لي امهن الكلام ده كدة م ببقى اعملي الاكل انتي بتعرفي اكل بناتك البدورنو وانتو اهل بيت م ضيوف اها اول يوم ليهن سون قراصه كبيييييرة وفوقها صلصة ولحم وقسموها لينا مثلثات اي زول ادو صحنو في يدو. واليوم الثاني عملو مكرونه ومعاها حاجات تانيه غايتو فيها طعم روب لكن م فرزتها شنو المهم ادونا ملاعق واشتغلنا ومصاريني يلوني زيييينتي ويسكتن عاد م اشتهن الكسرة اليوم التالت قالن الليله الفطور لازم يكون مختلف قولت الحمدلله معناها ملاح وقولت الليله عاد يا معدتي يوم عيدك افرحي وعيني تطلع وتنزل لمن جاء وقت الفطور اشوف ليك عيش مفتح في صينيه صغيرة ومحشي جزر وحاجات قولت ليهم ده شنو قالو شارومبا(شاورما تقصد) لفحت توبي وقولت كدي مشيت على حيطه الديوان وناديت ابو العيال وقلت لي اها يا اخوي الحكايه جابت ليها شارومبا شين العمل قال لي عليك بالحله الكبيرة ومفروكه الباميه وانشالله ما انسترنا
