سلام من ارض النيل سلام من ارض الحضارة سلام لكل أولاد وبنات النيل سلام لاهلى الطيبين فى شندى من غير حدود جغرافية هى الروعة والجمال هى الحضارة وثقافة الأجيال .
وأنا استمع لتلك الغنية يلا شندى نزور الحبايب تبادر لزهنى ربوع وجمال شندي وكيف نوثق لشندى من غير حدود جغرافية نعم هى شندى وهى ارض النيل
يلا شندى نزور الحبايب الفريع الهدلو الوضيب….
زاد حنينى لارض الشباب…
فر قلبى وزاد العذاب …
بى دمائى انا بكتب خطاب ….
انا وخيالى اليوم فى عتاب..
يلا شندى نزور الحبايب الفريع الهدلو الوضيب….
ياخ شندى مدنيه وجمال ..
فيها زولى انا سمح الخصال ..
ماحصل فى يوم قال وقال ..
ضاع منامى وتابع الخيال…
يلا شندى نزور الحبايب الفريع الهدلو الوضيب….
عايز اكتب لى شندى فوق …
قال لى اصبر بالله روق..
من عيونن ضاع العشوق ..
فر بسيمن شبه البروق ..
يلا شندى نزور الحبايب الفريع الهدلو الوضيب….
عايز اروح من شندى القرى..
من قريش راجع لى وراء..
فى القليع الصيد ياترى..
والله فى خيلات ضرا..
يلا شندى نزور الحبايب الفريع الهدلو الوضيب….
برضى ماشى وانا لى امل ..
جو الحوش ازداد الوجل ..
جينا للعرقوق فى مهل ..
فى الدويمات ناير المقل…
يلا شندى نزور الحبايب الفريع الهدلو الوضيب….
الوصول لى بلد الحبيب ..
في الفجيجة أزداد اللهيب ..
فى المتمه ياخ الطبيب …
ارحمونى وفى القوز اطيب..
يلا شندى نزور الحبايب الفريع الهدلو الوضيب….
فعلا نزور شندي المدينة وكانت حلة البحر ولمينا والري والسوق شندي فوق قلعة شنان وتكساس وسوق الشجرة وابو فراج والسرفيس وست كلتوم وفرنكا والقرداب والصبيراب والعوضاب والحضور والفكي يوسف ومعهد التربية حي الزهور جمال وورد والصرايا وميدان الجولف واسطبل الاحصنة والكنيسة والقيادة وهي الوطن وحامي الحمي مربع واحد بداية شندي وهو بكتور والمحطة والبطون وكسلا واشلاق البوليس والسجون والشركة والثانوي ثم الثورة وديم عباس وبادقس ومعليش والشهداء وكانت شندي سوف ندخل لكل حي ونتحدث عنه دينيا والخلاوي واجتماعيا واقتصاديا ثم نزور شندي القري وجمال القري وروعة وطيبة اهل القري وسلام من بت النيل لكل سوداني شنداوي اصيل.
