قال فى بدايه الحرب فى الخرطوم كنت قاعد فى بيتى فدخلوا على ناس وكانوا راكبين ليهم عربيه بوكس ومسلحين وانا ذاتى ماكنت عارفهم تابعين لمنو! ،بس شكلهم كده حراميه عربات، المهم دفروا الباب وجونى ليك جوة البيت ولقونا بنفطر وقالوا لى وين مفتاح العربيه بتاعتك وبكل هدواء شلت المفتاح وقلت ليهم اتفضلوا هاكم ليهوا ،وما كان ده جبن اوخوف منى ولاحاجه (واهلنا زمان قالوا الكترة غلبت الشجاعه) ما ممكن اضارب لى ناس اكتر منى ومسلحين بسبب عربيه وانا زول معاى اسرتى، المهم قبل يطلعوا حلفت عليهم لازم يفطروا وبعد كده يمشوا ،وجبت ليهم صينيه اكل وقعدوا اكلوا تمام ،فى واحد فيهم سألنى وقال لى نحن قلعنا عربيتك تعزمنا اكل ليه! فقلت ليهم موضوع شلتوا عربيتى ده موضوع براهوا وماعنده علاقه بعزومتى ليكم، انتوا ناس دخلتوا بيتى ولقيتونى باكل ومن حقى اكرمكم، وفى مثل بقول (اكرم عدوك) المهم سكتوا كلهم وكملوا أكلهم دوروا العربيه بتاعتى وطلعوا بيها اتخارجوا، وبعد ساعة جونى تانى راجعين ومعاهم واحد شكله كده غريب وعنده شنبات وصلعه ولابس ليه نظارة سوداء وشايل ليه كلاشن فى ظهره وشكله كده ده زعيم العصابه بتاعهم، وقال ليهم ده هو الزول العزمكم فطور وقالوا ليه ايوه، وقال لى تعال يازول انا عايز اسالك وتجاوبنى بكل صراحه، قلت ليه اتفضل ،قال لى جارك الجمبك ده عنده عربيه فى بيته ولا ماعندة؟ قلت ليه اسالنى عن نفسى وماتسالنى عن جارى وعربتى واديتكم ليها واما جارى ده مابعرف عنه حاجه، وانا كنت قاصد ومتعمد ما املكهم اى معلومه عن جارى عشان مايضروة رغم انه زول معرفتى بيه كانت بسبطه وسكن جديد جمبى قبل الحرب دى بفترة قصيرة جداً، المهم قال لى انت زول كريم وشجاع وبتقدر حقوق الجيرة والجار ،لكن احب اقول ليك حاجه اقسم بالله جارك الانت بتحامى ليه الآن ده ،هو البلغ عنك وارشدنا على بيتك وعلى وعربيتك..، واتلفت على الجماعة المعاه وقال ليهم رجعوا للزول ده عربيته نحن مابنسرق لينا راجل وارث الفراسه والكرم وبكرم ناس جاين يسرقوة جوه بيته، وهو ما ارجل مننا فى حاجه، وجدعوا لى مفتاح عربيتى واتخارجوا فاتوا، وبعدها ربنا اكرمى وطلعت بأسرتى وعربيتى الى عطبرة، وبعد الحرب انتهت فى العاصمه رجعت لبيتى فى الخرطوم ولقيته سالم وبيت جارى القبيل بلغ عن سرقه عربيتى لقيته مدمر، وسألت عنه وقالوا لى انه معتقل وعرفت فيما بعد انه كان متعاون ومتورط فى عمليات نهب وسرقه عربات بتاعت مواطنين.
